Este xoves 26 de maio celebrouse no Centro de Extensión Universitaria e Divulgación Ambiental de Galicia (CEIDA), ubicado no Castelo de Santa Cruz (Oleiros), un seminario para conmemorar o Día Europeo da Rede Natura 2000, que este ano 2022 coincidiu co 30 aniversario do Programa Life. O seminario, precisamente, tivo lugar no marco dun proxecto deste programa, o Life Fluvial, no que Emalcsa participa como socio e que ten como obxectivo mellorar o estado de conservación de corredores fluviais atlánticos na Rede Natura 2000. De feito, os organizadores do evento, coa colaboración da Cátedra Emalcsa-UDC, foron outros dous socios do Life Fluvial, a Reserva da Biosfera Mariñas Coruñesas e Terras do Mandeo e o Instituto de Biodiversidade Agraria e Desenvolvemento Rural (Ibader).

O seminario analizou diferentes proxectos Life de restauración de corredores fluviais e dividiuse en tres bloques. No primeiro deles, moderado por el director de I+D+i de Emalcsa, Ricardo Vázquez, interviron Pablo Ramil, director do Ibader, e Javier Ferreiro da Costa, investigador deste instituto universitario de investigación científico-técnica, para falar das actuacións de restauración en corredores fluviais levadas a cabo no marco do proxecto Life Fluvial como as desenvolvidas no encoro de Cecebre.

No segundo bloque, moderado polo director da Cátedra Emalcsa-UDC, Moisés Canle, o presidente do Grupo Naturalista Hábitat, Ricardo Ferreiro, expuxo a situación actual na que se atopa a flora e a fauna do encoro de Cecebre logo dos traballos de análise feitos polo seu grupo naturalista (coa colaboración de Emalcsa e financiados polo Life Fluvial), uns traballos que darán lugar a un proxecto de seguimento máis ambicioso a través da Cátedra Emalcsa-UDC; Catherine Farrel, investigadora do Trinity College de Dublín (Irlanda), participou de xeito online para explicar os traballos de restauración de hábitats que se están a facer no seu país en praderías extendidas en antigas dunas que albergan unha grande biodiversidade no marco do proxecto Life on Machair; Pedro Pablo Gallego, catedrático de Bioloxía Vexetal e Ciencias do Solo da Universidade de Vigo, abordou a xeración de plantas en actuacións de restauración ambiental; finalmente, José Antonio Fernández Bouzas, director do Parque Nacional Marítimo-Terrestre das Illas Atlánticas de Galicia, analizou o programa Life Insular que se está a desenvolver en diferentes illas atlánticas da Rede Natura 2000 e que ten como obxectivo a restauración das dunas grises e breixeiras secas europeas, labor no que, dixo, o voluntariado xoga un papel fundamental.

No terceiro bloque abordouse a gobernanza na Rede Natura 2000 e as Reservas da Biosfera. Foi nunha mesa redonda na que participaron a directora de Augas de Galicia, Teresa María Gutiérrez; o conselleiro técnico da Demarcación de Costas na Coruña, Carlos Gil; e o presidente do Grupo Naturalista Hábitat, Ricardo Ferreiro.

Tras un xantar a base de produtos da Reserva da Biosfera Mariñas Coruñesas e Terras do Mandeo, e como remate do seminario, fixeron unha visita guiada ao encoro de Cecebre para ver ‘in situ’ os traballos de restauración desenvolvidos no marco do proxecto Life Fluvial.

Compartir en...

Facebook

Twitter

Linkedin

email