O grupo de investigación Reactividade Química e Fotorreactividade (REACT!) da Universidade da Coruña organiza os vindeiros 25 e 26 de novembro na Facultade de Ciencias da Coruña a VI Xuntanza Nacional de Grupos de Fotocatálise. A Cátedra Emalcsa-UDC, a cuxo comité científico-técnico pertence o grupo REACT!, colabora neste evento xunto á Universidade da Coruña, o Campus Innova da UDC, MTB Tecnología de Precisión, a Edar Bens S.A. e Celta Ingenieros.

Este encontro celébrase cada dous anos co obxectivo de que os diferentes grupos de investigación presenten e compartan os traballos que están a realizar e debatan sobre eles con outros investigadores. Asimesmo, a xuntanza, á que asisten tanto especialistas de grande reputación no eido, como investigadores en formación cunha grande proxección, promove as sinerxias e as colaboracións entre os participantes de cara a futuros proxectos.

A Fotocatálise é unha tecnoloxía que permite realizar reaccións químicas en condicións de sostibilidade, rapidez, eficacia e baixo custo. Entre os procesos que aborda atópanse, por exemplo, a redución de CO2, a desinfección de augas residuais dun proceso industrial, superficies e atmosferas ou a xeración de combustibles H2, CH4…

Entre os obxectivos desta xuntanza está retomar o contacto personal entre os investigadores deste campo. Porén, habilitarase unha conexión por videoconferencia para aqueles que non podan asistir físicamente ao encontro.

Velaquí tedes máis información acerca desta reunión.

Compartir en...

Facebook

Twitter

Linkedin

email