A Cátedra Emalcsa-UDC vén de ampliar ata o 20 de decembro o prazo para enviar candidaturas á cuarta edición dos seus Premios, aos que poderán optar os estudantes que defenderan con éxito o seu Traballo Fin de Máster (TFM), relacionado coa auga, en titulacións da Universidade da Coruña nos cursos académicos 2022/2023 ou 2023/2024.
A temática dos traballos presentados deberá ter relación cos sistemas de auga urbana e deberá estar enmarcada no ámbito DUSA (Desenvolvemento Urbano Sensible á Auga), cuxo obxectivo é integrar os elementos do sistema de auga urbano co desenvolvemento urbano e a xestión da conca fluvial en pos de maximizar os beneficios económicos, sociais e ambientais. Os traballos poden abarcar temáticas diversas, dende a auga en orixe até o consumidor, incluíndo estudos ecolóxicos, caracterizacións fisicoquímicas, sistemas de distribución, avances tecnolóxicos, ou percepción social, entre outros.
O premio ao mellor Traballo Fin de Máster terá unha dotación económica de 1000 euros. Así mesmo poderánse conceder até dous accésit de 500 euros se o xurado así o considera.
O xurado, cuxa composición anunciarase antes do peche da convocatoria, estará formado por membros do Comité Científico-Técnico da Cátedra Emalcsa-UDC.
Como en edicións anteriores, a presentación de traballos realizarase por medio deste formulario web.
Velaquí podedes consultar as bases destes IV Premios Cátedra Emalcsa-UDC.
